Гэта вясновае свята заўсёды натхняе на творчасць. Прапануем свежыя ідэі, як упрыгожыць велікодны стол сваімі рукамі з дапамогай натуральных матэрыялаў.
Фота: Кацярына Буто
Зусім неабавязкова хадзіць па крамах, каб знайсці ўпрыгожванні для дэкору святочнага, і велікоднага ў тым ліку, стала. Проста шукайце і знаходзьце іх у прыродзе! Наш часопіс не стамляецца заклікаць вас да гэтага.
Азірніцеся вакол, калі будзеце шпацыраваць у лесе ці парку наступным разам (хоць на самой справе сімпатычныя прыродныя матэрыялы можна знайсці і недалёка ад дома, галоўнае – наяўнасць дрэў). Мох, кара дрэва, галінкі, камяні, арэхі – усё гэта ўжо само па сабе прыгожа, а калі прыкласці трохі высілкаў, то з дапамогай прыродных матэрыялаў можна стварыць нешта сапраўды ўнікальнае.
Прапануем вам зрабіць велікодны кошык-пянёк з непатрэбнай бляшанкі з-пад печыва, задэкараваўшы яе карой дрэва і мохам. Зрабіць гэта нескладана – у нас на сайце вы знойдзеце пакрокавы майстар-клас. Затое як эфектна такі кошык будзе выглядаць на велікодным стале!
Каб разбавіць зялёныя і карычневыя прыродныя адценні, мы дадалі белыя кветкі хрызантэмы – і ў сам кошык (проста ўставіўшы ў мох), і сабраўшы невялікі букецік. Замест вазы выкарыстоўвалі келіхі з каляровага шкла.
«Разыначка» дэкору нашага пасхальнага кошыка – самая звычайная морква 🙂 За тыдзень да свята мы паставілі яе ў ваду – і яна прарасла. Абрэзалі большую частку ядомага караняплода (каб з’есці, вядома!), а рэшту з зялёнымі хвосцікамі змясцілі ў цэнтр кошыка наўпрост у мох. Атрымалася вельмі ярка і жыццярадасна.
Замест сурвэтак пад сталовыя прыборы мы выкарыстоўвалі самую звычайную пергаментную паперу для запякання карычневага колеру. Выйшла вельмі бюджэтна, затое стылёва.
Натхняйцеся прыродай і будзьце здаровымі! Светлага вам свята, сябры.
Ваш ALOVAK