Прапануем не выкідваць наступным разам пасля святаў коркі з-пад віна і шампанскага – тыя, якія зробленыя з сапраўднага коркавага дрэва. Такія коркі могуць стаць выдатным матэрыялам для творчасці. Толькі зірніце, якія цацкі з іх можна зрабіць.
Елачныя цацкі рабілі: Таццяна Хлапкова, Кацярына Буто
Фота: Вадзім Буто
Як канструктар
Каб зрабіць цацкі з вінных коркаў, трэба акуратна распілаваць вінныя коркі папярок на роўныя часткі. Атрыманыя кружкі можна адшліфаваць наждачнай паперай, пасля чаго склеіць паміж сабой суперклеем і перацягнуць вяровачкай (для надзейнасці яе таксама можна прыклеіць). Такія цацкі можна размаляваць акрылавымі фарбамі на воднай аснове, папярэдне развёўшы іх вадой.
Коркі ў выглядзе чагосьці
А яшчэ вы можаце проста размаляваць коркі ў выглядзе чалавечкаў. Мацаванне можна зрабіць з дапамогай шпількі: акуратна ўторкніце яе ў корак, а праз пяцельку працягніце нітачку або леску. А як вам нашы алоўкі, выразаныя з коркаў? Дарэчы, корак выдатна рэжацца звычайным канцылярскім нажом.
Творчы патэнцыял коркаў бязмежны. Здаецца, што з іх можна зрабіць усё, што пажадаеце. Не бойцеся эксперыментаваць і падключаць дадатковыя матэрыялы – гузікі, дрот, бісер, вяровачкі, як гэта зрабіла майстрыца Таццяна Хлапкова.
(c) ALOVAK