Наш часопіс запусціў свой падкаст “СВАІМІ РУКАМІ” – гэта размовы з творчымі людзьмі пра тое, як яны ствараюць свае вялікія і маленькія праекты. Мы вырашылі падрабязней напісаць пра тое, што такое падкасты, і як іх можна слухаць.
Што такое падкасты?
Падкасты – гэта аўдыёперадачы, якія нагадваюць класічныя праграмы на радыё. Гэта могуць быць расказы, маналогі, размовы і нават серыялы на абсалютна любую тэму.
Калі зусім абагульніць, то падкасты – гэта як Youtube, толькі ў аўдыё-фармаце.
Тэрмін «падкастынг» прыдумалі ў ЗША ў 2004 годзе, спалучыўшы словы iPod і broadcasting («радыёвяшчанне»):
iPod + broadcast = podcast
Адрозненне ад радыё
Галоўная асаблівасць падкастаў – гэта тое, што яны распаўсюджваюцца праз інтэрнэт. Але гэта не адзінае адрозненне падкастаў ад звычайных радыёперадач:
|
Падкасты |
Радыё |
| Слухач пачынае слухаць падкаст з самага пачатку. | Слухач можа падключыцца да радыё ў любы час (напрыклад, з сярэдзіны перадачы). |
| Актыўнае, засяроджанае праслухоўванне. | Праслухоўванне на заднім фоне. |
| Падкаст часцей слухаюць у навушніках – гэта асабісты досвед. Знаходзішся адзін-на-адзін з падкастам. | Радыё часцей слухаюць праз прыёмнікі яшчэ з кімсьці – гэта агульны досвед. |
| Падкасты выходзяць у запісу. | Радыёэфіры адбываюцца ўжывую. |
Папулярнасць
Падкасты вельмі папулярныя ў заходнім свеце: на адным iTunes можна знайсці больш за мільён розных падкастаў, кожны дзень да іх дадаюцца новыя. У ЗША падкасты слухае кожны другі амерыканец.
Папулярнасць да падкастынга прыйшла і ў Расію – згодна з сацыялагічнымі апытаннямі, кожны 5 расіянін знаёмы з падкастамі. У Беларусі ж гэты трэнд толькі пачынаецца.
Чаму іх так любяць ва ўсім свеце?
Падкасты вельмі зручна слухаць, калі вочы і рукі занятыя. А вушы – вольныя:) У дарозе, на прабежцы, падчас прыборкі кватэры, мыцця посуду, заняткаў спортам.
Падкасты дазваляюць праводзіць час, які звычайна траціцца на руціну, з карысцю.
Калі вы ствараеце нешта сваімі рукамі, слухаць падкасты проста ідэальна.
Як слухаць падкасты?
Падкаст ALOVAK “СВАІМІ РУКАМІ” можна слухаць наўпрост на нашым сайце. Але зручней падпісвацца на ўпадабаны падкаст у нейкім мабільным дадатку, каб не прапускаць новыя выпускі.
Калі ў вас iPhone, то ў ім ёсць штатны дадатак «Падкасты». Калі Android, то хутчэй за ўсё ў вас ёсць Google Podcasts (калі не, можна спампаваць ў Google Play).
Слухаюць падкасты таксама на iTunes, SoundCloud, Яндекс.Музыка. Існуе шмат іншых мабільных дадаткаў – напрыклад, Castbox, Overcast, Pocket Casts, Spotify. Спрабуйце і выбірайце свой зручны спосаб слухаць падкасты!
Listen to Сваімі рукамі / Своими руками
(с) ALOVAK