Прысвячаемгэты артыкул унікальнаму беларускаму фатографу, майстру рэпартажнай здымкі Альфрэду Мікусу. На вялікі жаль, ён ужо не пабачыць гэты допіс. Сёлета гэты таленавіты і энэргічны чалавек раптоўна сышоў з жыцця, яму было ўсяго 57. Сімвалічна, што гэта адбылося ў дзень фатографа і падчас фэсту традыцыйнай культуры “Пятровіца”, які ён так любіў здымаць…
Тэкст: Вадзім Буто
Фота: Альфрэд Мікус
Альфрэд Мікус родам з Пружанскага раёна Брэсцкай вобласці. У прафесійную мастацкую фатаграфію ён прыйшоў у 42 гады. І ўжо праз пяць год стаў уладальнікам самых прэстыжных узнагарод у гэтай сферы – залатых медалёў FIAP (Міжнароднай федэрацыі фатаграфічнага мастацтва), UPI (Міжнароднага Саюза Фатографаў) і іншых вядомых сусветных фотасупольнасцей.
![](https://alovakmag.by/wp-content/uploads/2022/10/Z2xj8Xy2fLM.jpg)
Аб’ездзіўшы дзясяткі краін, ажыццявіўшы мноства фотапраектаў, спадар Мікус вырашыў для сябе, што за цікавымі і ўнікальнымі кадрамі не абавязкова ехаць далёка. Дастаткова глыбей даведацца пра Беларусь — пра яе культуру і традыцыі.
Так асноўнай тэмай для здымак у фатографа сталі старажытныя абрады, фэсты і святы, якія праводзяцца ў беларускіх вёсках і мястэчках.
![](https://alovakmag.by/wp-content/uploads/2022/10/67066960_2272518169498551_8836410837993259008_n.jpg)
Спадару Мікусу не падабаліся пастановачныя здымкі:
“Я за рэальныя сюжэты. А іх вакол незлічонае мноства. У гэтым пераканаўся яшчэ на пачатку сваёй фатаграфічнай кар’еры, калі з сябрамі-аднадумцамі аб’ездзіў дзясяткі беларускіх рэгіёнаў. Быў прыемна здзіўлены, як шмат у нашай краіне ўнікальных архітэктурных помнікаў — храмаў, закінутых сядзіб…”.
![](https://alovakmag.by/wp-content/uploads/2022/10/68939867_2332547296828971_1529367889088348160_n.jpg)
Фатограф лічыў, што турыстам у Беларусі трэба абавязкова паказваць нашы старажытныя абрады, ён лічыў іх “неверагодна каларытнымі”. У прыклад прыводзіў палескія “Ваджэнне куста” і “Перанос свечкі”, а таксама Пятроўскі фэст у Любанскім раёне:
“Вось што сапраўды трэба папулярызаваць! Усё зроблена ад душы, не для галачкі, а сапраўды для людзей. Такія мерапрыемствы не павінны быць зачыненымі дзействамі”.
![](https://alovakmag.by/wp-content/uploads/2022/10/42971962_1850791991671173_6828190615507828736_n.jpg)
Альфрэд Мікус дзяліўся сваім сакрэтам удалай здымкі:
“Кожны раз еду на абрад і кожны раз улюбляюся. Выбіраю двух-трох чалавек, якіх здымаю часцей за іншых, і рэальна ў іх улюбляюся. Пражываю кожную здымку, апускаюся ў характар, у эмоцыю. І пасля здымкі яшчэ 3-4 дні хаджу закаханым”.
![](https://alovakmag.by/wp-content/uploads/2022/10/67905028_2322940394456328_4982099605945581568_n.jpg)
![](https://alovakmag.by/wp-content/uploads/2022/10/37278117_1742868572463516_3279567938381676544_n.jpg)
Яшчэ больш адметных фота Альфрэда Мікуса з беларускіх фэстаў і святаў
![](https://alovakmag.by/wp-content/uploads/2022/10/AQsb822L8vw.jpg)
![](https://alovakmag.by/wp-content/uploads/2022/10/w82Hr7KbFbM.jpg)
![](https://alovakmag.by/wp-content/uploads/2022/10/109807757_3061520717264955_6290588007506057102_n.jpg)
![](https://alovakmag.by/wp-content/uploads/2022/10/101364461_2946383805445314_2283897147965308928_n.jpg)
![](https://alovakmag.by/wp-content/uploads/2022/10/42861246_1850791355004570_7785037963880038400_n.jpg)
![](https://alovakmag.by/wp-content/uploads/2022/10/J5Kg62-yTT0.jpg)
![](https://alovakmag.by/wp-content/uploads/2022/10/60667678_2176333152450387_9144519675705556992_n.jpg)
![](https://alovakmag.by/wp-content/uploads/2022/10/65097656_2233216286762073_1481606628691148800_n.jpg)
![](https://alovakmag.by/wp-content/uploads/2022/10/103571361_2968034249946936_1441478924229055793_n-1.jpg)
![](https://alovakmag.by/wp-content/uploads/2022/10/zFw9a7EhXCw.jpg)
(с) ALOVAK