Паказваем цікавыя калядныя упрыгожанні, якія можна зрабіць сваімі рукамі – экалагічныя, стылёвыя, рознага ўзроўню складанасці. Усе ўпрыожанні, якія вы ўбачыце ў матэрыяле, былі зроблены таленавітымі майстрамі спецыяльна для фотасесіі з альтэрнатыўнымі навагоднімі ялінкамі, арганізаванай анлайн-часопісам ALOVAK. Глядзіце, натхняйцеся і рабіце самі елачныя ўпрыгожанні сваімі рукамі з падручных матэрыялаў!
Фотаздымкі: Аляксандр Кладаў
Дэкор: Юлія Плавінская
Цацкі рабілі: Ірына Бельская, Алена Дзядзюль, Таццяна Несцерава, Кацярына Карэнюгіна, Яна Мелько, cakes.by
Цацкі з гофракардону
Калі ўпрыгожыць звычайную ці альтэрнатыўную елку выключна такімі цацкамі – выйдзе вельмі незвычайна і прыгожа! А рабіць іх ну вельмі проста, галоўнае, мець неабходныя матэрыялы – гофракардон, фарбы (гуаш, акрыл) і нажніцы. Колеры, формы – усё абмяжоўваецца толькі вашай фантазіяй.
Лепш за ўсё распісваць такія навагоднія цацкі з гофракардону з двух бакоў. Каб вешаць іх на елку – зрабіце дзіраколам або шылам дзірачку, зацягніце пятлю.
Шары ў тканіне
Для выраба такіх шароў вам спатрэбяцца старыя цацкі ці пенапластавыя нарыхтоўкі, абрэзкі тканін і стужачкі. На нашай елцы-раме яны замацаваны пры дапамозе шпілек і сашчэпак, а для таго, каб павесіць іх на звычайную елку, трэба прадугледзець пяцельку для галінак.
Паспрабуйце падабраць для адной елкі тканіны, якія гарманічна спалучаюцца паміж сабой, выкарыстоўваце як аднатонныя, так і тканіны з прынтам.
Гірлянда з гузікаў
Для гірлянды з гузікаў нам спатрэбіўся залацісты шнурок і гузікі з какоса. Замест шнурка можна выкарыстоўваць шпагат, а гузікі абраць драўляныя, альбо падабраць пластмасавыя, якія спалучаюцца паміж сабой па колеры і памеры.
Саламяныя сняжынкі
Навагоднія цацкі з саломы выглядаюць вельмі стылёва. Такія эка-сняжынкі, як у нас, можна зрабіць, злучыўшы аднолькавыя па даўжыні саломінкі крыж-накрыж з дапамогай моцнай ніткі. Нітка можа быць як у тон саломе, так і кантраснай – чырвонай, або зялёнай, напрыклад.
Месяцы з фетру
Месяцы пашыты з мяккага фетру: дзве аднолькавыя дэталі злучаны абмётачным швом і запоўненыя ўцяпляльнікам файбертэк. Упрыгожыць іх можна пацеркамі, бісерам, паеткамі. Не забудзьцеся пра пяцельку!
Вязаныя сняжынкі
Для таго, каб звязаць кручком сняжынку, вам спатрэбяцца кручок (памер 0,75 – 2,0) і белыя тонкія баваўняныя ніткі. Вязаць сняжынку трэба па прынцыпе сурвэткі а ўжо разгарнуцца тут ёсць дзе! Можна знайсці схемы вязання ў інтэрнэце, а можна скласці сваю ўласную, камбінуючы спалучэнні паветраных пяцелек, слупкоў без накіду і слупкоў з адным (двума, трыма) накідамі.
Пасля таго як сняжынка будзе гатовая, застанецца надаць ёй форму з дапамогай ПВА або крухмалу. Пасля гэтага выраб добра адцісніце і замацуйце на роўнай паверхні пры дапамозе шпілек. Пачакайце, калі яна цалкам высахне.
Сушаныя дзелькі апельсіна
Апельсінавы рэцэпт для навагодняга дэкору! Нарэжце апельсіны на скрылікі і падсушыце іх у духоўцы ці на батарэі, падклаўшы кардонку ці паперу. З часам такія скрылікі могуць пацямнець, каб гэтага не адбылося, перад сушкай пакладзіце іх у ваду з лімонным сокам на паўгадзіны (на шклянку вады сок аднаго лімона).
Арэхі-цацкі і гірлянда з арэхаў
Проста і прыгожа. Раскаліце арэх на дзве палавінкі, з’ешце змесціва, устаўце пяцелькі з ільнянога шпагату і склейце дзве палоўкі. Вы можаце пакінуць арэхі ў іх натуральным выглядзе, а можаце пафарбаваць у любы колер, у нашым выпадку белы.
Гірлянда з арэхаў робіцца па тым жа прынцыпе, толькі ўклейваем не пяцелькі, а вяровачку. Зверху мы адцянілі арэхі белым налётам: паўсухім пэндзлем нанеслі белую фарбу.
Сняжынкі з бісеру
Каб зрабіць такую сняжынку, спатрэбіцца звычайны бісер, тонкі металічны дрот і трохі ўяўлення. Мы выкарыстоўваем рублены дрот серабрыстага колеру і напаўпразрысты матавы бісер, бо яны выдатна імітуюць структуру і колер сапраўднай сняжынкі.
Ядомыя цацкі
Салодкія і духмяныя – пасля новага года такія цацкі можна з’есці. А гэта значыць мінімум адкідаў і часу на ўборку!:) Выкарыстоўвайце формы для печыва альбо выразайце па шаблоне.
(с) ALOVAK