Калядны вянок на стол сваімі рукамі

Дызайнерка Таццяна Сіняўская кожны снежань прыдумвае і стварае непаўторныя калядныя ўпрыгожанні і прэдметы дэкору для дома.  ALOVAK ужо традыцыйна просіць расказаць Таню падрабязней пра працэс іх стварэння. З гэтага майстар-класа можна даведацца, як зрабіць традыцыйны калядны, ці адвентавы, вянок на стол з прыродных матэрыялаў.

Тэкст, фота: Таццяна Сіняўская

Калядны вянок — гэта ўпрыгожванне ў доме ў перадкалядны час, якое традыцыйна рабілася ў форме вянка з чатырма свечкамі. Такі вянок замацоўваецца вертыкальна або ўсталёўваецца на стол. У першы з чатырох тыдняў адвенту запальваецца першая свечка, на наступным тыдні – другая і г. д.

Вы можаце прытрымлівацца традыцый, а можаце стварыць калядны вянок выключна як элемент святочнага дэкору вашага дома, не прывязваючыся да датаў і сэнсаў.

Матэрыялы і  інструменты, якія спатрэбяцца:

• Аснова вянка* (пра яе – далей),
• свежыя галінкі хвоі і елкі блакітай,
• сухія суквецці руты (пра альтэрнатывы – ніжэй),
• любыя цытрусавыя.
• ніткі, стужкі,
• скотч,
• фарба акрылавая,
• 4 тонкія свечкі.

*Аснова вянка

У якасці асновы каляднага вянка можна выкарыстоўваць лёгкадаступныя цяпер пенапластавыя загатоўкі. Але мы прапануем стварыць вянок цалкам з прыродных матэрыялаў. Таццяна дзеля вянка загадзя нарыхтавала лазу – і не пашкадавала, бо ўсё аздабленне добра і трывала замацоўваецца на ёй з мінімальным ужываннем скотча і клею.

Калі ў вас няма магчымасці знайсці лазу, вы можаце зрабіць аснову з гнуткіх галінак бярозы – пакрокавы майстар-клас ёсць на нашым сайце.

Рыхтуем аснову з лазы

Галінкі лазы замацоўваем у аснове скотчам, разбіраем на 2 пасмачкі і пераплятаем матузком. Скручваем колам да патрэбнага дыяметра, а лазовую рэшту ўплятаем у атрыманае кола для трываласці. Такую аснову вельмі цяжка расцярушыць, і да яе можна мацаваць усё астатняе аздабленне. Я пакінула некалькі лозак на ўпрыгожанне сцен – і зрабіла аналагічныя загатоўкі маленькага памеру.

Дэкор вянка

Хваёвыя галінкі з доўгай ігліцай я выкарыстоўвала на бакавыя вонкавыя часткі вянка  для стварэння дадатковага аб’ёму. Дзеля гэтага я замацоўвала галінкі тонкімі трывалымі ніткамі – яны дазваляюць адвольна фіксаваць галінкі да асновы, і форма атрымліваецца ахайнай.

На верхнюю частку вянка я прымацоўвала галінкі елкі блакітнай – наўпрост утыкаючы ў лазу ў адным напрамку.

Далей у тым жа напрамку аналагічна замацоўваліся загадзя пафарбаваныя белым акрылам галінкі руты.

Замест руты можна выкарыстоўваць кветкі кермеку (Limonium), якія прадаюцца ў любой кветкавай краме. Іншыя альтэрнатывы – жывыя суквецці снежнаягадніку, бружмелю ці бузіны, але варта памятаць, што некаторыя з гэтых ягад атрутныя, і калі дома ёсць малыя дзеці ці жывёлы, лепш выкарыстоўваць сухацветы.

Свечкі добра замацоўваюцца ў прагаліны між лозамі ва ўнутраным дыяметры вянка.

Апошні крок – цытрусавыя долькі, якія мацуюцца да ялінкавых галінак з дапамогай нітак.

Такія долькі трэба падрыхтаваць загадзя: апельсін ці іншыя цытрусавыя нарэзаць на тонкія долькі і адправіць у духоўку (70 градусаў) на сушку.

Былі памкненні аздобіць мой вянок стужкамі, але ўсё ж вырашыла пакінуць яго мінімалістычным.

Вянок гатовы!

(с) ALOVAK