На святы мы не маглі праігнараваць творчасць кухараў і кулінараў, якія ствараюць смачныя стравы і вядуць свае кулінарныя блогі па-беларуску. Спадзяемся, нешта з нашай падборкі рэцэптаў вам прыйдзецца да смаку і ўпрыгожыць ваш святочны стол.
Закускі
Рэцэпт запечаных грушаў з грэцкімі арэхамі і мёдам ад @hanna.latushka
Вам спатрэбіцца:
- 3 няцвёрдыя грушы;
- 150 гр. сыру дарблю;
- 50 гр. грэцкіх арэхаў;
- некалькі лыжак мёду;
- каліва праванскіх траваў.
Гатуем:
- Трэба разрэзаць ігрушы, лыжачкай дастаць насенне, а ў сярэдзінку пакрышыць сыр дарблю, грэцкія арэхі і пасыпаць травамі.
- Выпякаць каля 15–20 хвілінаў на 180°.
- Дастаць, паліць мёдам, атрымліваць асалоду ❤️
Рэцэпт бутэрбродаў з журавінавым жэле ад @smachnaya_mova
Вам спатрэбіцца:
- курыны паштэт,
- 12 кавалкаў тоставага хлеба,
- 1 пакецік журавінавага жэле (або 0.5 л журавінавага соку і 1 ст.л. жэлаціну),
- 50 мл вады,
- 80 г цукру,
- 150 г журавін,
- 1 ст.л. таркаванага імберца,
- папрыка
Гатуем:
- Для жэле: 500 мл журавінавага соку нагрэйце і злучыце з жэлацінам, мяшайце да поўнага распушчэння. Заліце ў форму, пастаўце ў лядоўню, каб застыла.
- Тым часам шклянкай выціснііце кругі з лустаў тоставага хлеба і падсмажце.
- Злучыце ў рондалі цукар і ваду, пастаўце на агонь. Калі закіпіць, дадайце журавіны, варыце, пакуль ягады не лопнуць. Дадайце таркаваны імберац і папрыку і варыце, пакуль соус не загусцее.
- У жэле выцісніце кругі той жа шклянкай, што і ў хлебе.
- На лусту хлеба пакладзіце кругляк жэле. Паверх другую лусту хлеба. Потым курыны паштэт. Напрыканцы журавінавы соус.
Рэцэпт рулецікаў з вяндлінай і сырам ад @uzv.hrodna
Для цеста:
- 1 яйка,
- 1 ст.л. цукру,
- соль,
- 500 г мукі,
- 5 г сухіх дрожджаў або 18 г свежых дрожджаў,
- 70-80 г сланечнікавага алею,
- 250 г топлёнага малака
Для начыння:
- 300 г вяндліны,
- 300 г сыру мацарэла,
- 1 яйка
Гатуем:
- Зрабіць рошчыну, змяшаўшы дрожджы, цукар, муку і трохі малака.
- Калі дрожджы “ажывуць”, дадаць астатнія інгрэдыенты і замясіць цеста.
- Пакінуць цеста даходзіць на 1-1,5 гадзіны.
- Гатовае цеста падзяліць на чатыры часткі.
- Кожны кавалак раскачаць на пласт.
- На пласта выкласці вяндліну, сыр і пасыпаць арэгана ці базілікам.
- Скруціць рулецікі.
- Выкласці на пакрытую пергаментам бляху.
- Памазаць узбітым яйкам, паставіць у духоўку
Фаршыраваныя баклажаны ад @smachna_esci
Вам спатрэбіцца:
- баклажаны – 2 штукі
- яйкі – 2
- сыр – 100 г
- шпінат ці іншая зеляніна
- маянэз
- часнык – 2 дзелькі
Гатуем:
- Баклажаны нарэзаць на пласцінкі, заліць халоднай вадой, дадаць 1 ст. л. солі і пакінуць на 20 хвілін.
- Паставіць варыць яйкі.
- З баклажанаў зліць ваду і добра прамыць. Смажыць на добра разагрэтай патэльні на алеі да залацістага колеру з абодвух бакоў.
- Нацерці сыр, здрабніць часнык, нарэзаць яйкі і зеляніну, заправіць маянэзам.
- Сфармаваць рулецікі. Смачна есці!
Асноўныя стравы
Рэцэпт фаршыраванай скумбрыі ад @elena_bronislavovna
Вам спатрэбіцца:
- скумбрыя (2 шт.),
- бульба,
- цыбуля,
- морква,
- грыбы,
- цвёрды сыр,
- соль,
- часнок,
- кроп,
- спецыі,
- алей
Гатуем:
- Скумбрыю памыйце і папатрашыце са спіны, дастаньце хрыбет, памыйце, абсушыце папяровым рушніком, пасаліце.
- Абсмажце на патэльні цыбулю, моркву і любыя грыбы да гатоўнасці, пасаліце, дабаўце кроп і спецыі.
- Бульбу парэжце на скрылёчкі, пасаліце, пакладзіце кроп і часнок, паліце алеем.
- Пакладзіце рыбку ў форму, напоўніце яе фаршам. Атрымаюцца лодачкі.
- Абкладзіце бульбай так, каб лодачкі трымалі форму і не падалі.
- Запякайце пры 200 градусах 30 хвілін , пасыпце нацёртым сырам і запякайце яшчэ 10 хвілін да румянай скарынкі.
Рэцэпт курынага філе ў гарбузовым соусе ад @consort.by
Вам спатрэбіцца:
- курынае філе (2 шт),
- гарбуз (400 г),
- вяршкі 15% (200 мл),
- масла (20 г),
- алей (1 ст.л.),
- часнок (2-3 зубкі),
- куркума (1 / 2 ч.л.),
- арэгана, (1 ч.л.),
- базілік (1 ч.л.),
- соль і перац.
Гатуем:
- Гарбуз нарэзаць кубікамі, выкласці яго на засланую пергаментам бляху, апырскаць алеем і запякаць 20 хвілін пры 200 градусах.
- Тым часам абсмажыць у алеі загадзя прамытае і нацёртае соллю і перцам курынае філе з двух бакоў па адной хвіліне, каб запячатаць усе сокі ў мясе.
- Запечаны гарбуз перакласці ў чашу блэндара, дадаць часнок, здрабніць.
- Затым дадаць у атрыманае гарбузовае пюрэ, вяршкі, базілік, арэгана, куркуму і папрыку, соль і перац. Узбіць яшчэ раз.
- Філе змясціць у форму для запякання і заліць атрыманым соусам.
- Запякаць курынае філе ў гарбузовым соусе 40 хвілін пры тэмпературы 180 градусаў.
Рэцэпт кіша з ласосем і брокалі ад @ejlei
Для цеста:
- 250 г мукі,
- 120 г халоднага сметанковага масла,
- 60 г халоднай вады,
- дробка солі
Для начынкі:
- 400 г філе ласося,
- 250 г брокалі,
- 200 г феты,
- трошкі сыру з цвіллю – пасыпаць верх,
- 4 яйкі,
- 75 г вяршкоў,
- соль, перац, праванскія травы – на ваш густ
Гатуем:
- Масла нарубіць у муку, наліць ваду, дадаць соль. Змяшаць, вымесіць цеста, раскачаць на пасыпанай мукой паверхні.
- Выкласці ў форму, пракалоць відэльцам шмат разоў. Гатаваць аснову у духоўцы 15 хвілін пры 200°С.
- У аснову выкласці начынку пластамі.
- Яйкі і вяршкі змяшаць, дадаць прыправы, заліць сумессю кіш. Пасыпаць сырам.
- Гатаваць 40 хвілін пры 170°С.?
Рэцэпт запечанай свіной шыі ад @alesia_foodblog
Вам спатрэбіцца:
- свіная шыя – 1,5 кг,
- белае сухое віно – 100 мл.
Для марынаду:
- cоль – 3 ч.л.,
- маяран – 1 ч.л.,
- чабор – 1ч.л.,
- чорны перац – 1/2 ч.л.,
- размарын – 2 галінкі,
- лаўровы ліст – 4 шт,
- часнок – 2 зубчыкі,
- аліўкавы алей – 2 ст.л.
Гатуем:
- Змешваем аліўкавы алей, перац, маяран, чабор, соль і дробны часнок.
- Шаруем кавалачак свініны марынадам, кладзем у талерачку, абкладваем размарынам і лаўровымі лісточкамі.
- Накрываем і адпраўляем у халадзільнік.
- Праз 12 гадзін дастаем шыю, пратыкаем відэльцам, пераварочваем і адпраўляем яшчэ на суткі ў халадзільнік.
- Перакладваем мяса ў рукаў для запякання, уліваем віно, закрываем рукаў.
- Робім невялікія дзірачкі ў рукаве.
- Выпякаем 1,5 гадзіны пры 200°С.
Салодкае
Рэцэпт труфеляў з нуту ад @greenmom_in_the_kitchen
Вам спатрэбіцца:
- 500 г варанага нуту
- 15 мяккіх іранскіх фінікаў (прыкладна 130 г)
- 4 ст л кэраба
- 2-3 ст.л. какосавага ўрбеча (альбо алею, калі вам не прынцыпова)
- 1 ч л ванільнага экстракту (калі ёсць)
- кедравыя арэшкі/крышаныя фундук/міндаль – на ваша жаданне
Гатуем:
- Усе інгрыдыенты змяшяшаць у камбайне/блэндары (з фінікаў дастаць косткі).
- Дадаць арэшкі, скатаць шарыкі, абваляць у какосавай стружцы/кэрабе альбо дробным насенні (мак, чыа, кунжут) і адправіць у лядоўню на пару гадзін.
- Кэраб можна браць як неабсмажаны, так і абсмажаны. Гэтая альтэрнатыва какаве дае асаблівы арамат цукеркам і робіць іх дазваляльным пачастункам для маленькіх ласуноў – падыходзіць дзеткам ад 10 мес.
Рэцэпт шакаладнага кекса ад @kurapatka
Вам спатрэбіцца:
- Цукіні- 1 шт. (200 г.)
- Спелы банан -1 шт. (80 г.)
- Мёд, фінікі ці какосавы цукар (на выбар)
- Какосавае масла – 2 ст. л.
- Мука б/г- 100 г.
- Какава-парашок – 40 г.
- Соль – 1/4 ч. л.
- Яблычны воцат альбо лімонны сок – 1 ч. л.
- Сода – 1 ч. л.
- Арэхі грэцкія ці фундук – на ваша жаданне
Гатуем:
- Узбіць ў блэндары банан, цукіні, масла, фінікі, лімонны сок.
- Асобна змяшаць муку, какаву, соду і соль.
- Злучыць дзве масы і добра перамяшаць.
- Выкласці у форму для кекса, засцеленую пергаментам, і выпякаць 35-45 хв. пры 200°.
- Астудзіць і лепш пакласці на некалькі гадзін у лядоўню.
Рэцэпт печыва “Мазурка” ад @lalilu_lya
Вам спатрэбіцца:
- 2 яйкі
- 1 шклянка грэцкіх арэхаў
- 1 шклянкі разынак
- 1 шклянкі мукі
- 1 шклянка цукру (я брала палову)
- 1,5 ч.л. разрыхляльніку
- ванілін
Гатуем:
- Убіць спачатку бялкі з цукрам, дадаць па адным жаўткі.
- Потым пакрышачку муку з разрыхляльнікам.
- Перамяшаць з арэхамі (іх трэба падрабніць) і разынкамі.
- Пячы пры 180 градусах.
- Парэзаць адразу, пакуль гарачае.
Рэцэпт дэсерту “Птушынае малако” ад @hodny_keks
Вам спатрэбіцца:
- 180 г масла,
- 100 г згушчонкі,
- 70 г бялку,
- 150 г вады,
- 300 г цукру,
- 9 г агар-агару,
- дробка лімоннай кіслаты,
- дробка ваніліну або 10-20 г ванільнага цукру
Гатуем:
- Масла і згушчонку пакаёвай тэмпературы ўзбіць міксерам хвіліны 2-3 да пышнасці.
- У асобнай місцы ўзбіць бялок, дадаць дробку лімоннай кіслаты.
- У посуд з тоўстым дном уліць ваду, усыпаць цукар з ванілінам і агар-агар – і на пліту.
- Памешваць да таго часу, пакуль сіроп не пачне цягнуцца з лыжкі, нібы тонкая нітачка.
- Калі сіроп гатовы, яго трэба ўліць у бялок, бесперапынна ўзбіваючы ўсю масу міксерам.
- Цяпер да бялкоў паступова ўвесці крэм з масла і згушчонкі, усё добра размешваючы.
- Як толькі размяшалі апошнюю лыжку крэму, выліваем масу ў форму. Хвілін праз 15 накрыць цыратай і ў халадзільнік на гадзіну.
- Пасля парэзаць, абкачаць у какаве, какосавай стружцы ці арэхах. Смачна есці!
Рэцэпт імбірнага торта ад @cudounaya_cukernya
Для каржоў (на 3 формы 18 см):
- 300 г мукі;
- 175 г сметанковага масла;
- 150 г цукру “Цудоўная цукерня”;
- 100 г карычневага цукру; 3 яйкі;
- 2 ч.л. разрыхляльніка;
- 220 мл малака;
- 2 ч.л. молатай карыцы;
- 1/2 ч.л. молатага кардамону;
- 1 ч.л. імбіру.
Для крэму:
- 180 г сметанковага масла пакаёвай тэмпературы;
- 500 г крэм-чызу;
- 150 г цукровай пудры;
- 100 г брусніцаў.
Гатуем:
- Узбіць яйкі з цукрам да пышнай масы.
- Прасеяць сухiя iнрэдыенты ў яечную сумесь. Уліць растопленае масла і малако, змяшаць.
- Напоўніць формы цестам і выпякаць пры 180 градусах да поўнай гатоўнасці.
- Перавярнуць каржы на рашотку і астудзіць.
- Для крэму ўзбіць масла, крэм-чыз і цукровую пудру. Зліць сок з размарожаных брусніцаў.
- Сабраць торт, наносячы крэм на кожны корж i пасыпаючы бруснiцамi. Абмазаць бакi торта крэмам i упрыгожыць на свой густ.
Рэцэпт бісквіту для лянівай гаспадыні ад @dannissas
Вам спатрэбіцца:
- 4 яйкі (можна і 3 калі яны не маленькія)
- 1 шклянка цукру
- 1 шклянка пшанічнай мукі
- 1 дробка солі
- 1 чайная лыжка разрыхляльніку
- 1 пакецік вініліну
Гатуем:
- Узбіваем яйкі з дробкай солі, не аддзяляючы жаўткі ад бялкоў, пакрыху дадаём увесь цукар, і калі ў вас планетарны міксер, пакідаем кухню на 10 хвілін. Але калі міксер звычайны, тады крыху паўзбіваем, пакуль яйкавая маса не павялічыцца ў аб’ёме. Пажадана хвілін 10))
- Далей асобна змешваем разрыхляльнік і ванілін з мукой, і толькі пасля гэтага ўводзім муку ва ўзбітыя яйкі з цукрам. Змешваем.
- Перакладаем у змазаную алеем форму і ставім у папярэдне разагрэтую духавую шафу на хвілін 40-50 пры 180°. Першыя хвілін 20-25 яе нельга адчыняць, каб бісквіт не асеў.
Бісквіт гатовы!
Бонус!
Рэцэпт сочыва з сасновых шышак ад @sasnouskaya17
Вам спатрэбіцца:
- 1 кг зялёненькіх шышачак (якія яшчэ не зацвярдзелі, іх можна пракалоць пазногцем)
- 1 кг цукру
- 10 шклянак вады
Гатуем:
- Збіраем шышкі, перабіраем іх ад смецця і заліваем вадой у рондалі, у якім потым будзем варыць сочыва.
- Настойваем так шышкі суткі.
- Вымаем шышкі, адкладаем – яшчэ спатрэбяцца.
- Водны настой змешваем з цукрам і варым на ціхім агні, памешваючы, пакуль наш сіроп не пачне гусцець і набываць чырвонае адценне (гэта дзесь 1,5-2 гадзіны).
- Напрыканцы гатавання закідваем зноў шышкі ў сіроп. Варым разам яшчэ хвілін 10.
- Усё! Цудадзейны сродак для здароўя і добрага настрою гатовы! Аблізваем лыжку, даём астыць і разліваем па слоічках.
(с) ALOVAK
Якая смаката! Дзякуй вялікі!