Прапануем азеляніць свой творчы куток разам з намі, скарыстаўшыся незвычайнай тэхнікай вырошчвання хатніх раслін, якая прыйшла ў нашую краіну з далекай Японіі. Гаворка вядзецца пра какедаму.
Какедама – гэта земляны шар, абгорнуты ў мох, у які пасаджана дэкаратыўная расліна. Выглядае такі спосаб вырошчвання хатніх раслін надзвычай прывабна, як быццам кавалачак лесу завітаў ў хату, каб падараваць гаспадарам спакой і цішыню. А сам працэс стварэння какедамы заварожвае і спрыяе аднаўленню чысціні думак.
Для стварэння какедамы спатрэбяцца:
- дэкаратыўная расліна
- грунт
- баваўняная нітка
- лясны мох
Для зручнасці раім працаваць ў пальчатках і мець напагатове місу з вадою для дадатковага змочвання зямлі.
Працэс
Падрыхтуйце грунт для стварэння землянога кома. Грунт лепш браць падыходзячы для канкрэтнай расліны і перад пачаткам працы яго неабходна добра ўвільгатніць. Мох таксама раскладзіце на роўнай паверхні і шчодра спырсніце вадой. Для працы падыходзіць звычайны лясны мох, які можна самастойна сабраць у хваевым лесе.
Акуратна, стараючыся не пашкодзіць карані, дастаньце раслінку з кантэйнера або гаршчочка. Прыбярыце лішні грунт з карэньчыкаў. Не трэба разбіраць усе карані, няхай яны трымаюць сваю форму, прыбірайце толькі тое, что само паддаецца пры дотыку.
Затым бырыце невялікія порцыі мокрага падрыхтаванага грунту і аблеплівайце клубок каранеў з усіх бакоў, фарміруючы далонямі земляны шар.
Калі земляны шар зроблены, вазьміце невялікі кавалачак моху і пачынайце абкладаць ім зямлю. Прыкладаючы кожны кавалак моху, абкручвайце вакол шара баваўняную нітку, каб зафіксаваць мох і падтрымаць форму какедамы.
Калі мох з усіх бакоў закрые зямлю, праверце яшчэ раз, ці правільнай формы шар у Вас атрымаўся і дадайце мох, калі недзе есць відавочныя паглыбленні.
Какедама гатова!
Даглядаць за какедамай нескладана: сачыце за тым, каб земляны ком не перасыхаў, своечасова апырскваючы яго вадой, або нават апускаючы какедаму ў емістасць з вадой на непрацяглы час. Не забывайцеся, што найлепшыя расліны для паляпшэння мікраклімата Вашай хаты або майстэрні – хларафітум, фікус, алоэ, спатыфіллум, сансевіерыя, герань. Смела перасяляйце гэтыя расліны ў дамкі з моху і атрымлівайце асалоду ад прысутнасці лясного паветра вакол Вас.
(c) ALOVAK
ідэя цікавая ,але ці не будзе пры паліванні расліны ўсё сцякаць на падлогу і шпалеры?
[…] Майстар-клас, як стварыць какедаму сваімі рукамі – гля… […]